Näimm 

Sieʹbrrkåʹdd molldââtt sluuʹžbest ouddâl veänccmõõžž tõi ooudâst, kook äigga näittlõõttâd. Näimmpoʹdde noorõõttâm sieʹbrrkåʹdd molldââtt näimmpooddâst veäʹnccpaar ooudâst. Papp blouslââvv paar ko son veänccad suännaid. Moʹlidva da blouslõs kueʹdde näittlõõttâm poodd älggam vieʹnc.  
 

Veänccõõttmõš 

Veänccõõttmõõžž vuäitt tuåimted tõn mâŋŋa ko veäʹnccpaarr lij vuäǯǯam vieʹnc cõõǥteʹmvuõtt-tuõđštõõzz. 

Suäna, kook äigga čuõlmmâd kriistlaž vieʹnc, lie kristtmättškooul jååttam ceerkav vuäzzla. Jõs pieʹllkueiʹmin nuʹbb ij leäkku ceerkav vuäzzlaž, teʹl suäna vuäiʹtte čuõlmmâd kriistlaž vieʹnc, jõs tõt, kååʹtt ij leäkku ceerkav vuäzzlaž lij mõõn-ne jeeʹres ceerkavkååʹdd leʹbe ååskvaž õutstõõzz vuäzzlaž. Veäncca äiggai leʹbe juʹn näittlõõttâm paari nõõm iʹlmmtet sieʹbrrkååʹdd õhttsaž sluuʹžbest, jõs suäna jie leäkku tõn ǩeâlddam. Suännai ooudâst molldõõđât sluuʹžb õhttsaž ouddmolldõõzzâst.  

Veänccmõõžž tuåimat papp da musiikâst vaʹsttad jaakân, da veäncctååimtõõzzâst âlgg saǥstõõllâd suännain.  

Veänccmõõžž tuåimtet ceerkvest, dååma leʹbe jeeʹres pääiʹǩest tõn mieʹldd mäʹhtt papp da veäʹnccpaarr ääʹššest sueʹppe. 

Veäʹnccpooddâst âʹlǧǧe leeʹd mieʹldd uuʹccmõsân kueʹhtt tuõđšteei.