Hyppää sisältöön

Govva: Sara Kangas-Korhonen

Mieđuštanrohkosboddu

 

Sálbma

ovdamearkka dihte sg 178, sg 356, sg 468

 

Álgosivdnideapme

Áhči ja +Bártni ja Bassi Vuoiŋŋa nammii. 

 

Biibbalsálbma (Sá. 90: 1-6. 12-17)

        
          Hearrá, don leat leamaš min dorvu buolvvas bulvii. Juo ovdal go várit riegádedje,
          ovdal go eanan ja máilbmi šadde, don ledjet.
          Ipmil, agálašvuođas agálašvuhtii don leat.
          Don divttát olbmuid šaddat fas muoldan ja cealkkát:
          “Máhccet muldii, olbmománát.”
          Duhát jagi du čalmmiin leat dego ievttáš beaivi mii manai meattá,
          nugo idjagohcinvuorru. Don sihkastat olbmuid eret,
          sii leat dego iđitnagir. Sii jávket nugo rássi;          
         vaikko dat liđiida iđđedis, de eahkedis dat goldná ja goiká.

         Oahpat min lohkat beivviideamet riekta, vai mii oažžut viissis váimmu.
          Jorgal min beallái, Hearrá!
          Man guhká don ádjánat?
          Árpmit min, iežat bálvaleddjiid!
          Gallet min árpmuinat juohke iđida,
          vai mii sáhttit leat ilus buot beivviideamet.
          Illudahte min seammá guhká go leat váivvidan min,
          nu galle jagi go mii leat gillán.
          
          Divtte iežat bálvaleddjiid oaidnit du stuorra daguid,
          divtte min mánáid oaidnit du hearvásvuođa.
          Hearrá, divtte min dovdat du láđisvuođa.
          Suova midjiide menestuvvat buot maid mii dahkat.

 

Rohkos 

Bassi, ealli Ipmil. 

Giitu das, ahte mii oažžut guođđit

_____________ Du háldui. 

Divtte agálaš čuovgga báitit sutnje. 

Skeŋke ráfát maiddái min iežamet váibmui. 

Leage midjiide árbmugas

ráhkis Bártnát Jesusa Kristusa dihtii. 

 

Áhččámet

Áhččámet, don guhte leat almmis. 

Basuhvuvvos du namma. 

Bohtos du riika. 

Šaddos du dáhttu, 

mo almmis nu maiddái eatnama alde. 

Atte midjiide odne min beaivválaš láibbi. 

Ja atte midjiide min suttuid ándagassii, 

nugo miige ándagassii addit velggolaččaidasamet. 

Alege doalvvo min geahččalussii, 

muhto beastte min bahás eret. 

Dasgo du lea riika ja fápmu

ja gudni agálašvuhtii. 

Ámen. 

 

Ruossamearka ja muođuid gokčan

Hearrá áddos dutnje agálaš vuoiŋŋadusa, čuvgejehkos du agálaš čuovga. 

Rohkosboddu ollašuhtti dahká ruossamearkka oamehasa gállui ja cealká:

Bassi eŋgelat jođihehkoset du agálaš eallimii. 

Rohkosbottu ollašuhtti sáhttá gokčat oamehasa muođuid liinniin dahje bivdit

gean nu oapmahaččain dahkat dan. 

 

Buressivdnádus

Hearrá buressivdnidivččii din ja 

várjalivččii din. 

Hearrá čuvgešii muođuidis didjiide

ja livččii didjiide árbmugas. 

Hearrá jorgalivččii muođuidis din

beallái ja attášii didjiide ráfi. 

Áhči ja +Bártni ja Bassi Vuoiŋŋa nammii. 

Ámen. 

 

Loahpahanmusihkka

ovdamearkka dihte sg 178, sg 356, sg 468, sg 474, sg 490