Hyppää sisältöön

Ääiʹjpoddsaž ođđâz

 

Teâđtõs 9.5.2022

Sääʹm-musiikk prääʹzniǩ ceerkavpeeiʹvin

Säʹmmlaž ceerkavpeeiʹvid jäʹrjste Aanrest 5.-7.8.2022. Noorõõttmõõžž teeʹmmen lij Pââʹss Toll – Pââʹss Aalmi (Pyhä Tuli – Pyhä Kansa) da noorõõttmõš čõõđte ââʹn viiđad vuâra. Säʹmmlaž ceerkavpeeiʹvin säʹmmlai musikkäʹrbbvuõđ liâ viõkkâs vueʹss peeiʹvi ohjjelm.

Ceerkavpeiʹvvkåvvsest jäʹrjste kueʹhtt konseeʹrt. Piâtnâc 5.8. čiâss 19 virsskonseeʹrtest "Čále Jesus iežat gova" čuäʹjtâʹtte Anna Näkkäläjärvi-Länsman da Raimo Paaso. Viirsid läulla äʹrbbvuõđlain läullamnaaʹlin še õõutsââʹjest. Konseeʹrt looppâst jeäʹǩǩes-sluuʹžb jååʹđat aaʹrhelpispp Tapio Luoma.

- Lij õmmsallaš, mäʹhtt urkui suõmin pâstt še lââʹzzted da puʹhtted ouʹdde säʹmmlai läullamnaaʹlid da tõn pueʹrmõõzzid peäʹlid, Paaso ceälkk.  Näkkäläjärvi-Länsman m ieʹldd suu tuʹlǩǩõzzâs pohtt ođđ da vuäʹmm maaiʹlm, seäjjteen virssäʹrbbvuõđ vueʹssen tän poodd. Miârkkteeʹjes lij, što maaddârjieʹnni jiõnn viirsin seäkknââvv Raimo Paaso urkuin raajjâm jiõnnkueʹstlma.  

 

Sueʹvet 6.8. čiâss 19 konseeʹrtest čuäʹjtâʹtte kueʹhtt kuʹǩes liinj musikkneeʹǩǩ, Tero Harju da Aimo Aikio õhttsažtuâjjan šõddâm õʹhttenårrum Čaʹppesrääʹstes-õhttõk. Čaʹppesräʹstta  puuʹtʼtõs nårrai nuõrttsääʹmǩiõllsain käpplõõǥǥin da musiikk lij čõõđtum tän mätta aainâs sosiaalʼlast mediast. Käpplõõǥǥid čuäʹjtâʹlle noorõõttmõõžžâst akuustlânji, Aimo Aikio såitt kitara da Tero Harju läull. – Ceerkavpeeiʹvin čuäʹjtõõttmõš lij ođđ da heärvvai toobdâlm, koon vueʹrddep aaʹlšin, čuäʹjtõõtti ceäʹlǩǩe.

 

Anna Morottaja čuäʹjat konseeʹrtest äʹrbbvuõđlaid  aanarsääʹmǩiõllsaid liivđid (leeuʹdid). Livđe lij vokaalmusiikk da čuäʹjtemkriiʹlcest lij Anna õhttu jiõnines. Livđđi kõõskâst suu jiõnn sååjj še luâđ jiõni jeuǯǯmõʹšše. Suu vuäitt ouddmiârkkân kuullâd kaaʹǩǩteei čuânnjan leʹbe hiâleei reppan.

Anna Morottaja ns. Karhu-Pekka Äʹnn lij aanarsäʹmmlaž musiikkneǩ. Son lij ååraž Aanrest Muddusjääuʹr reeddast. Musiikk raajjmõõžž lââʹssen son šeell kueʹl, ooss mueʹrjid, rääjj ǩiõtt-tuâjaid da mättʼtad aanarsääʹm ǩiõl da kulttuur. Tän eeʹjj aalǥâst Anna lij čõõđtam maaiʹlm vuõssmõõzz livđe cd-jiõntõõzz. Tõn nõmm lij õõutǩeʹrddsânji Livđe da måtmid cd-jiõntõõzz käpplõõǥǥin kuullâp še ceerkavpeeiʹvi konseeʹrtest.

 

Konseeʹrt kuälmad vueʹzzest vaʹsttad Sámi Grand Prix 2022 läuʹllǩeâlb vueiʹtti Máret

 Gaup- Juuso. Son čuäʹjtââtt konseeʹrtest Tundra Electro õhttõõǥǥin. Tundra Electro õhttâd äʹrbbvuõđlaid sääʹmmlaaul ǩiččlõddmõʹšše elektrooʹne musiʹǩǩe da äʹrbbvuõđla intiaanmusiikk suõmid. Tundra Electro lij säʹmmlaž juõiggi da läullai Máret Gaup-Juuso da taarrlaž musikkneǩ-suõmmeei Patrick Shaw Iversen eeʹǩǩen 2016 altteem õhttõk.

- Kõskksažäʹšš lij juõigg da juõiǥin vuäitt õlmmeed määŋgaid aaʹššid, vääžnʼjummsen tååbdid. Čuäʹjtõõlam še äʹrbbvuõđlaidjuõiǥid da juõiǥid musiikkin.  Gaup-Juuso ceälkk.  

 

Virssläullamäʹrbbvuõtt õhttad

Virssläullamäʹrbbvuõtt lij tääʹrǩes vueʹss säʹmmlai ceerkvallaž jieʹllem. Musikk lij õhtt vääžnai vueʹss tän noorõõttmõõžž õhtteei teeʹmm, kååʹtt lij määŋgpeällsânji ooudâst še sluuʹžvin ja Vuâsppåʹdsluužmin.  Virssläullamäʹrbbvuõtt seill da seʹrddai ođđ puõlvvõõǥǥid lääuleeʹl äʹrbbvuõđlaid viirsid. 

***

Säʹmmlaž ceerkavpeeiʹv liâ neellj eeʹjj kõõskin jäʹrjstum ceerkvallaž noorõõttmõõžž, koon kõõskõs lij säʹmmlaž Vuâsppåʹdsluužâmjieʹllem. Ouddmiârkkân õhttsaž moʹlidva da virssläullamäʹrbbvuõtt raʹvvje da stääʹne säʹmmlai jiõglvaž õhttvuõđ. Ohjjlmest liâ še konseeʹrt da kulttuurohjjelm, saǥstõõllmõõžž da seminaar. Noorõõttmõõžž täävtõssân lij raʹvvjed da staanad sääʹmǩiõl  sââʹjj da oouʹdeed tõi âânnmõõžž ceerkvin.

Säʹmmlai ceerkavpeeiʹvi jäʹrjstummšest vaʹsttee Lääʹdd ev.lut. ceerkav sääʹmtuâj saǥstõõllâmkåʹdd, säʹmmlai ceerkavsuåvtõõzz Taarrâst da Ruõccâst, Oulu aaʹrhelkåʹdd, Aanar seäʹbrrkåʹdd da Oulu ortodookslaž aaʹrhelkåʹdd.

Lââʹssteâđaid:

Ceerkav sääʹmtuâj piisar Erva Niittyvuopio p. 040 769 0044, erva.niittyvuopio@evl.fi

Vääžnai liiŋk: (Käivv: evl.fi)

Noorõõttmõõzz neʹttseidd

Säʹmmlai ceerkavpeeiʹvi ohjjelm

Teâđ aazztemvaaitõsmääinain

 

Teâđtõs 18.2.2022


Pispp Jukka Keskitalo: Sääʹm ceerkavpeeiʹv lij kåčč õhttsaž tollpeällsa


Viiđad Sääʹm ceerkavpeeiʹv riâžžât 5.-7.8.2022 teeʹmin Pââʹss toll - Pââʹss meer. Šõddmõš riâžžât neellj eeʹjj kõõskin. Ouddlõs ceerkavpeeiʹv leʹjje Ruõccjânnmest, Arvidsjääuʹrest ǩeässa 2017, Lääʹddjânnmest riâššâmnalla åårrai ceerkavpeeiʹvid seʹrddeš eeʹjjin õõudårra koronapandemia diõtt. 


Määŋgpeällsaž programm


Sääʹm ceerkavpeeiʹv lie ceerkvallaš šõddmõõžž, koon kõõskõs lij säʹmmlaž sluuʹžvjieʹllem. Ouddmiârkkân õhttsaž moʹlidva da viirslaullâmääʹrb nâânee da tueʹrjjee säʹmmlai jiõglvaž õhttvuõđ.  Prograammâst lie še konseert da kulttuurprograamm, saǥstõõllmõõžž da seminaar. Šõddmõõžž tääʹvtõssân lij nââneed da tueʹrjjeed sääʹm ǩiõli stauuzz da ooudeed tõi âânnmõõžž ceerkvest. Ceerkavpeeiʹvin ǩiõttʼtõõlât kõõččmõõžžid, kook õhttee jeäʹrbi mieʹldd tâʹvv vuuʹd ǩeâllʼjeei ouddnummša da säʹmmlai ceerkvallaš toimmjummuž ouddnummša. Ouʹdde puhttum lie tuõttvuõtt- da suåvâdvuõttprosessa õhtteei ääʹšš še. 


Pispp Jukka Keskitalo lij ravvsânji mieʹldd peeiʹvi prograammâst. Pääiʹǩ âʹlnn lij še aaʹrhelpispp Tapio Luoma da jeeʹres ceerkav jååʹđteei Ruõccâst, Taarâst da Ruõššâst. Kokksummuš mäʹtǩǩ ceerkavpeiʹvvkueʹzzin lij Tansania Morogorost pueʹtti maasaipispp Jacob Moretost, kååʹtt puätt ceerkavpeeiʹvid. 


– Meeʹst lie vääžnai teeʹm saǥstõõllâmnalla da kueiʹmineen jiânnai mättjemnalla. Sääʹm ceerkavpeeiʹvi teeʹmm lij šiõtlânji Pââʹss toll – Pââʹss meer da ceerkavpeeiʹv lie mâʹte kåčč õhttsaž tollpeällsa, pispp Jukka Keskitalo särnn. 

Sääʹm ceerkavpeeiʹvi riâššmõõžžâst vaʹsttee Lääʹddjânnam sääʹmtuâi saǥstõõllâmkåʹdd, Oulu aaʹrhelkåʹdd, Säʹmmlaž ceerkavsuåvtõõzz Taarâst da Ruõccâst, Aanar sieʹbrrkåʹdd da Lappi ortodookslaž sieʹbrrkåʹdd. Bareeʹnts ceerkvi suåvtõs tuärjj Ruõšš säʹmmlai vuässõõttmõõžž ceerkavpeeiʹvid.

Vuässõõttjin kannat tän poodd mieʹrǩǩeed šõddmõõžž kaʹlndaaʹre da huõllâd instemvaʹrrjõõzzin. Poorrâmpääiʹǩ lie vââʹlljest määŋgain paaiʹǩin da peiʹvvporrmõš da peiʹvv-veäʹrpaʹǩaatid vuäǯǯ peʹce vuuʹd hoteellin, še vuässõttjid kääzzkõʹstti kueʹđest. Ceerkavpeeiʹvi programmkaartâst käunnai teâtt šõddmõšpaaiʹǩin. Sääʹm ceerkavpeeiʹvi vuällamvuõtt lij välddum lokku da neʹttseeidain programm lij õlmstõttum kääuʹc jeeʹres ǩiõlin. 

Snimldõk: Čõõđtemnalla åårrai šõddmõõžž markknâsttemkartt 

Lââʹssteâđ:


Ceerkav sääʹmtuâj piisar Erva Niittyvuopio teʹl. 040 769 00 44, erva.niittyvuopio@evl.fi 
Šõddmõõžž neʹttseidd lij tääiʹben da prograamm lij tääiʹben. Teâđ instempaaiʹǩin lie tääiʹben. (Teâttkäivv: Ceerkav evl.fi -seiddõs) 
Lääʹddjânnam ev. lut. ceerkav sääʹmtuâi ođđ neʹttseeid: Lääʹddjânnam evaŋkeel-luteerlaž ceerkav - evl.fi

 

Pueʹtted tiõrvân ođđ ev.lut. ceerkav sääʹmǩiõllsaž seeidaid! 

Lääʹdd ev.lut. ceerkav sääʹmǩiõllsa neʹttseeid liâ čõõđtum 4.2.2022

Lääʹdd ev.lut. ceerkav âiʹdde čõõđtum sääʹmǩiõllsaž neʹttseiddõs kääzzkâstt ceerkav sääʹmǩiõllsaid vuäzzlaid õõuʹdab pueʹrben. Siiʹsǩe lij pukin koolmin Lääʹddest mainstum sääʹmǩiõlin: nuõrttsääʹm-, aanarsääʹm-, da tâʹvvsääʹmǩiõlin. 

Seiddõs da tõn siiʹsǩid lij rajjum vuõss-sââʹjest raajjʼji vieʹǩǩin da nuʹtt, što tõt kääzzkõõstči
vueiʹtlvõbân puârast säʹmmlaid. Siiʹsǩi puuʹtteeʹji âʹlǩǩe tobddad puârast säʹmmlai kulttuur,
jiõglvažvuõđ da symboliikk. Kulttuursensitiivlažvuõtt lij vuâmmšum še kaarti vaʹlljummšest.

Seiddõõzzâst pââʹjde ouʹdde jeärbõʹžžen säʹmmlaid kõskksaid siiʹsǩid. Säʹmmlaid jeärbõžʹžen vääžnai
kriisttla äʹrbbvueʹǩǩ liâ ouddmiârkkân kaiddõs-škooul da konfirmaatia, koin lij jõnn miârkktõs
sääʹmkulttuurâst.

“Lij vääžnai, što säʹmmla vueiʹtte ââʹnned jiiʹjjes jieʹnnǩiõlâs äʹššõõttmen ceerkav seeidain. Tän miârkktõs
pâʹjjan jeärbõʹžžen tâʹl, ǥu kõõččmõš lij jiiʹjjes jieʹllem miârkkteeʹjest pooddâst, mâʹt-a håʹt jieʹllem muttsin,
jiõglvain tuʹmmjõõzzin leʹbe väʹǯǯlõs jieʹllemvueʹjjin. Seiddõõzzâst kaunnai vuâđđteâtt ceerkvest da
kriisttlažååskast, leša seämma ääiʹj siiʹsǩein lij raavâs teäddõs aaʹššin da eettmõõžžin, kook liâ
säʹmmlõõžžâst kulttuurâst miârkkteeʹjes”, ceäʹlkk äʹšštobddi Henna Ahlfors Ceerkavhaʹlltõõzzâst.
Seiddõõzz raajjʼjin kõskksaž rool lij leämmaš pâʹjjmättʼtõõtti Sara Keräsest kååʹtt lij tuåimmjam
siiʹsǩepuʹtteeʹjen da neʹtt-tuåimmteeʹjen de säʹmmlažtuâjj väʹlddkååddlânji koordinõʹsttjest, rovastt Erva
Niittyvuopiost.


“Tuäivam, što seeid vuäitči kääzzkâʹstted vueiʹtlvubân puârast mij jeeʹres ǩiõlläʹrttlid. Vuârdam še
maacctõõzz seeidai siiʹsǩest, leʹbe ǥu miiʹne tääʹrǩes äʹšš lij meädda, vueiʹtte oummu piijjâd tõʹst saaǥǥ.
Späʹssbõõžžam Tauno Ljetooff nuõrttsääʹmǩiõllsai seeidai teeʹkstin, Marja-Liisa Olthuis da Jouni Aikio
seeidai ǩiõli taʹrǩstummšest da pukid sniimmjid, ǩeäin vuäǯǯaim lååʹv ââʹnned sij snimldõõǥǥid”, ceäʹlkk
Erva Niittyvuopio. 

Neʹttseeidai ooudâsviikkmõš juätkkai

Seiddõõzz siiʹsǩei teâuddmõš da ooudsviikkmõš juätkkje čõõđtõõzz mâŋŋlest še. Seiddõõzzâst puäʹtte
tuejjeed õõʹnnituʹtǩǩummuš, koon maacctõõzz vuâđast seiddõzz oouʹdeemtuâj vueiʹtte juätǩǩed.
Evl.fi- seiddõõzzin lij siiʹskâž lääʹdd- da sääʹmǩiõli lââʹssen ruocc-, eŋglõš-, čiõlgg-, da sieʹvvemǩiõlin.

Lââʹssteâđaid:
Henna Ahlfors, Kirkkohallitus, p. 050 326 9012, henna.ahlfors@evl.fi
Erva Niittyvuopio, Oulun hiippakunnan tuomiokapituli, p. 040 769 0044, erva.niittyvuopio@evl.fi