Katekismus 

Katekismus 

Katekismus muitala oanehaččat ja čielgasit kristtalašvuođa vuođđodoahpagiid. Dan ulbmilin lea oahpistit min eallit oskkus Ipmilii ja ráhkisvuođas guđet guoibmámet vuostá. 

Logi báhkkoma, oskkudovddastus ja Áhččámet – rohkos leat Katekismusa váimmus. Dat gullet maiddái eará girkogottiide gullevaš kristtalaččaide. 

Logi báhkkoma ovdanbuktá eallima vuođđolága: maid mii galgat bargat ja maid guođđit barggakeahttá. Oskkudovddastus muitala das, gii Ipmil lea, maid son lea min ovddas dahkan ja maid son midjiide addá. Áhččámet – rohkos oahpista min rohkadallat Ipmila, vai bisošeimmet oskkus sutnje ja sáhtášeimmet eallit su dáhtu mielde. Gástta sakrameanta lea min vuoiŋŋalaš eallima vuođđu. Eahkedaččat nanne min eallit oskkus ja ráhkisvuođas. Biibala sátni, rihpa ándagassiiaddojupmi, rohkos ja Ipmila buressivdnádus guddet min čađa eallima. 

  1. Mun lean Hearrá, du Ipmil. Dus eai oaččo leat eará ipmilat
  2. Ale geavat boastut Hearrá, Ipmilat, nama.
  3. Basut vuoiŋŋastanbeaivvi.
  4. Gudnejahte áhčát ja eatnát.
  5. Ale gotte.
  6. Ale daga náittosrihkkosa.
  7. Ale suolát.
  8. Ale atte boasttu duođaštusa lagamuččastat.
  9. Ale oamastala lagamuččat opmodaga.
  10. Ale oamastala lagamuččat beallalačča, bargiid, šibihiid, alege maidige mii su lea.

    Logi báhkkoma
    Logi báhkkoma

Mun oskkun Ipmilii,

Áhččái, Buotveagalaš

almmi ja eatnama sivdnideaddjái,

ja Jesusii Kristusii,

Ipmila áidna Bárdnái,

min Hearrái,

guhte sahkanii Bassi Vuoiŋŋas,

ja riegádii nieida Márjás,

gillái Pontius Pilatusa áigge,

russiinávlejuvvui, jámii ja hávdáduvvui,

njiejai vulos jápminriikii,

čuožžilii jápmimis goalmmát beaivve,

manai bajás albmái,

čohkká Ipmila, Áhči, Buotveagalačča,

olgeš bealdi

ja boahtá doppe dubmet

ealliid ja jápmiid,

ja Bassi Vuigŋii,

bassi oktasaš searvegotti,

bassi oktavuođa, suttuid

ándagassiiaddojumi,

oačči bajásčuožžileami

ja agálaš eallima.

Áhččámet, don guhte leat almmis.

Basuhuvvos du namma.

Bohtos du riika.

Šaddos du dáhttu,

mo almmis nu maiddái eatnan aldi.

Atte midjiide odne

min beaivválaš láibámet.

Ja atte midjiide min suttuideamet ándagassii,

nugo miige ándagassii addit

min velggolaččaidasamet.

Alege doalvvo min geahččalussii,

muhto beastte min bahás eret.

Dasgo du lea riika, ja fápmu, ja gudni

agálašvuhtii.

Ámen.

“Munnje lea addojuvvon buot fápmu

almmis ja eatnama alde.

Vulget dan dihte

ja dahket buot álbmogiid mu máhttajeaddjin:

Gásttašehket sin Áhči ja Bártni ja Bassi Vuoiŋŋa nammii

ja oahpahehket sin doallat buot

maid mun lean gohččon din doallat.

Ja mun lean dinguin

buot beivviid gitta máilmmi loahpa rádjái.”

(Matt. 28:18-20)

Hearrámet Jesus Kristus,

dan ija go son behttojuvvui,

válddii láibbi, buressivdnidii, doadjalii,

attii dan máhttajeaddjiidasas ja celkkii:

Váldet ja borret,

dát lea mu rumaš,

mii addojuvvo din beales.

Dahkket dan mu muitun.

Son válddii maid geara,

giittii ja dajai:

Váldet ja juhkket dás, dii buohkat.

Dát gearra lea ođđa lihttu mu varas,

mii golggahuvvo din beales

suttuid ándagassiiaddojupmin.

Nu dávjá go dii das juhkabehtet,

dahkket dan mu muitun.

(Matt. 26:26-29; Mark. 14:22-25; Luuk.22:14-20; 1.Kor. 11:23-25)

Hearrá buressivdnidivččii din ja várjalivččii din.

Hearrá čuvgejehkos muođuidis didjiide

ja lehkos didjiide árbmugas.

Hearrá jorgalehkos muođuidis din beallái

addos didjiide ráfi.

Áhči ja Bártni ja Bassi Vuoiŋŋa nammii.

Ámen.

Back to top